اللينكس ده نظام تشغيل
بص ببساطة حاجة زى الويندوز
طب مانا عندى الويندوز استعمل اللينكس ليه؟
هقولك يا سيدى
- مفتوح
- بلوشى
- ليه تستخدم برامج مش مرخصه لو ممكن تاخدها ببلا
- انسى الفايروسات
- مش هتضر تصطبه كل اسبوعين
- السرعة مش بتتناسب عكسيا مع الزمن
- ااوعى تنسف حمامك القديم
- لو عندك play station3 ما تصطب عليه لينكس
- اتحكم فى كل حاجة
- سهل لو عاوزه يبقى سهل
- بقية الحاجات فى يوم تانى عشان عاوز انام
1-مفتوح
-
ايه مفتوح ده انت بتعمل دعايه لموقعك ولا ايه؟
انا قصدى بمفتوح انه مفتوح المصدر وده برضه سبب تسمية الموقع المهم معنى كلمه مفتوح المصدر انك ممكن تبص فى الكود بتاعه وتتعلم منه وتعدل عليه وتطوره ومحدش حيكلمك فى انظمة تانية حتى لو اشترتها مجرد محاوله انك تغير فيها حاجة ضد القانون ولو مش مصدقنى اقرا اتفاقية المستخدم
يعنى من الاخر حرية
2-بلوشى
-
ماشى انت بتقول انه مجانى يعنى انت بتشوف حد فى مصر بيدفع تمن حاجة؟
اه انا معاك انك ممكن تجيب اسطوانه ويندوز من على الناصية بخمسة جنيه بس دى تعتبر نسخة مسروقة لو حتقبلها على نفسك انا مقبلهاش
وكمان لو اتقفشت بيها حتتظبت وانتوا عارفين التظبيت فى البلد دى عامل ازاى
3-ليه تستخدم حاجات مش مرخصة(مسروقة) لو ممكن تاخدها ببلاش ومتبقاش مسروقة
عارف البرامج الى انت بتجيبها مسروقة دى فى برامج مجانيه بتقوم بنفس الوظيفة تقريبا وساعات بتقوم بيها احسن والدليل على كده برنامج firefox
-
يعنى الناس دى بتكسب منين ؟
متقلقش انت عليهم هما بيشتغلوا بس هو انت لازم تدخل الفلوس فى كل حاجة يا عم بيشتغلوا متطوعين
-
يعنى انت هتقارن واحد متطوع بواحد بيقبد 5000 جنيه ؟
اه عشان تبقى عارف الواحد بيطلع احسن حاجة عنده لما يكون بيعمل الحاجة دى عشان عاوز يعملها مش عشان يقبض منها قرشين
اوعى تقولى ان الانترنت اكسبلورر و الناس اللى عامله بتقبض فلوس كتير احسن من الفاير فوكس اللى مبنى على جهد تطوعى
ملحوظة
اينشتاين كان متطوع
3-انسى الفايروسات
بص يا سيدى عدد الفايروسات اللى فى نظام اللينكس قليل جدا واكبر حاجة ممكن يعملوها انهم يبطئوا الجهاز ومجرد ما ترستر الجهاز يبقى الفايروس راح لان النظام شغال بنظام التصاريح
وغير كده امن من الاختراق عن انظمة ميكروزفت
بس انا بتكلم عن جهازك انت يعنى الجهاز اللى عندك فى البيت
السيرفرات دى موال تانى وخصوصا لو انت على استضافة مشتركه
فى حاجات لازم تعملها للتأمين لان بيبقى عليهالحاجات دى معروضة للناس كلها على الويب عن طريق سيرفر الاباتشاى بيبقى ليه يوزر ليه تصريح دخول فى كل حته فلو واحد من العملا قدر يوصل لليوز ده ممكن يخش على النظام كله ويعمل اللى هو عاوزه
ومن الواضح ان صاحب السيرفر اللى انا مستضيف الموقع ده عليه ميعرفش اى حاجة عن الحماية لانه اساسا عامل الاباتشى من غير يوزر واى حد ممكن يخش على ملفات كل الناس وغباء بعيد عنك
ممكن اى حد من العملاء بتوع الراجل ده يوقعله السيرفر فى 5 دقايق
دلوقتى اى حد ما يعرفش اى حاجة فى اى حتة بيشترى فى بى اس ويبيع استضافات
بس الشهر اللى دفعته ده يعدى على خير وانا احول على شركة تانية على طول او اشترى فى بى اس واآمنه بنفسى
4-مش هتضر تصطبه كل اسبوعين
بسبب نفس الاسباب اللى فوق
يمكن يكون السبب الوحيد اللى يخليك تصطبه انك تكون بتحب تجرب انظمة تشغيل جديده
انا فى الفترة اللى فاتت جربت 17 توزيعة لينكس و 3 بى اس دى و osx و solaris
واستقريت اخيرا على يويونتو لينكس (حتجنن بقالى 5 شهور مجربتش حاجة جديدة)
5-السرعة مش بتتناسب عكسيا مع الزمن
فى الويندوز كل ما تفتح جهازك اكتر كل ما يبقى ابطأ لكن فى اللينكس النظام مش كده وانا حتكلم ان شاء الله عن الموضوع ده بالتفصيل فى موضوع منفصل
6- اوعى تنسف حمامك القديم
عندك جهاز قديم شوية هات نسخة لينكس خفيفة وخليه يرجع يعيش تانى
لكن لو الجهاز من ايام الجنيه الخشب ممكن تصطب عليه لينكس من غير واجهة رسومية وتحوله راوتر او فاير وال
7-لو عندك play station3 ما تصطب عليه لينكس
ايوه انتى سمعتنى صح صطبه على بلاى ستاشن ثرى عادى هو انا مش قولتلك انه بيتصطب على كل حاجة
قارن جهازك بالبلاى ستاشن ثرى
كفايه البروسيسور بتاعه
بروسيسور البلاى ستاشن 3 بمقام 8 بروسيسور
و 3.2GHz
ملحوظة بس هو بيتعرف على الهارد وير بتاع البلاى ستاشن كله حتى الجوى ستيك ال 6-axis وقارى اسطوانات البلو راى
وفى ناس بتقلك مش بيتعرف على حاجة
8-اتحكم فى كل حاجة
اللينكس بيديك تحكم فى كل حاجة ومش فى الشكل بس
رغم ان موضوع الشكل ده فيه مرونه كبيره جدا لكن ده ميمنعش ان المرونه دى فى كل حاجة
لان مفيش حاجة المستخدم المتقدم ما يقدرش يفيرها القضية كلها انه يعرف يغيرها منين
والباقى كله بيبقى تعديل فى ملف نصى
9-سهل لو عاوزه يبقى سهل
الموضوع مش موضوع سهولة وصعوبه الموضوع موضوع تعود يعنى لو فى حد اول مره يستخدم الكمبيوتر استخدم لينكس وفض يستخدمه فتره وبعد كده اديتله جهاز ويندوز هيقولك ده صعب قوى
والعكس صحيح
تانى حاجة الموضوع موضوع نفسى
يعنى لو حاجة سهلة وانت حاسس انها صعبة حتبقى صعبة جدا
ولو حاجة صعبة بس انت حاسس انها سهلة حتبقى سهلة جدا
والدليل فى الموضوع ده فى الدراسة يعنى مثلا انا
فى سنه اولى كنت بعتبر الميكانيكا سهلة جدا رغم ان صحابى كانو بيعتبروها صعبة فبالتالى هى سهلة بالنسبة لى
وكنت بعتبر الكيميا صعبة رغم ان كل صحابى كانو بيقولوا انها سهلة فبالتالى بقت صعبة بالنسبة لي
عشان كده حاول انك ما تحكمش ان الحاجة صعبة قبل ما تجربها لانك مجرد انك حطيت فى دماغك انها صعبة بقت صعبة
على العموم انا وظيفتى هنا انى اوريك انه سهل
فى المواضيع الجايه ان شاء الله
10-بقية الحاجات فى يوم تانى عشان عاوز انام
الجواب باين من عنوانه انا عاوز انام عشان فصلت خلاص
ومش قادر افكر
أحدث التعليقات