مفتوح

عمرك حلمت احلام او فكرت فى افكار خلتك تضحك على نفسك لما تصحى
انا حصلى حاجاات غبية من دى كتيير اوى
حاجة منهم ودى اكتر واحدة خلتنى اضحك كانت ف الفترة اللى كنت بصطب فيها جينتو كان ساعتها عندى امتحانات ميد تيرم فى الكلية وكنت سهران لغاية الساعة 5 تقريبا بصطب الجينتو وبذاكر Circuit
كان عندى امتحان تانى يوم
المهم
نمت على نفسى جنب الجهاز فكانو فى البيت بيصحونى الصبح عشان اروح الامتحان فبدأت افوق وبعدين كنت عاوز اقوم ففتحت /bin وكنت بدور على الملف التنفيذى اللى بيقومنى وهما يصحونى وانا اقولهم ثانية بدور عليه المهم بعد ما قومت دخلت الحمام اتوضى
وانا فى الحمام اكتشفت انى عمال اتخيل حاجات غريبة فوقفت قدام المراية وقررت انى اضيع الجزء التخيلى ففضلت احاول انى اجيب الجذر التربيعى لمجموع مربعى عشان اخلص من الجزء التخيلى عشان اجيب نفسى فى time domain وابعد عن ال imaginary Domain

دى تقريبا كانت اكتر حاجة ضحكتنى على نفسى

—————————————-

تانى اكتر حاجة ضحكتنى لما فوقت ودى كانت من حوالى اسبوعين تقريبا

كنت فى اليوم ده سهران بحل مسائل برمجة من ACM-Live Archive وتعبت فقررت اخش انام كانت الساعة 3 تقريبا وكالعادة بيصحونى الصبح عشان اروح الكلية

اصحى يا احمد

بدأ عقلى يفكر انا لازم اقوم البس وانزل بسرعة ففكرت اننى اخزن نفسى فى Int وارجع احط نفسى O/p فى الهدوم وانزل بسرعة

وبعد تفكير اعمق قولت ال Int مش هينفع ممكن اكون كتير وميكفيش

long long وبعدين رجعت فى كلامى وقولت ان برضة ممكن اجى فى test case اكبر من كده

اصحى يا احمد

رحت رادد بصوت عالى وقولت طب هو قال فى ال Statment  انا اخرى كام

اخرك كام ازاى وهو مين اللى قال

خلاص انا هتصرف

وقولت بس انا احط نفسى فى string والعملية هتتظبت بس العمليات الحسابية هتبقى اصعب

قوم يا احمد……ايه ده انت سخن اوى

ويوميها مرحتش الكلية طبعا

اكتر حاجة انا مستغربلها انى مفكرتش اخزن نفسى فى BigInt